Isumat.com/Setyembre 20, 2023
Nagkamamatay in usa nga kapitan hin barangay ngan usa nga tanod ha magkalain nga insidente hin panmusil ha Paranas ngan San Jose de Buan, Samar hadin nag-agi nga pira ka adlaw.
Ha report nga nakadangat ha PNP Regional Office, ginkilala an mga biktima nga hira Tito Llamado, 59 anyos, chairman ngan residente han Brgy Anagasi, Paranas, Samar; ug an tanod nga hi Wenifredo Dacles, 47 anyos, nag-uukoy ha Brgy Catalina, Jiabong, Samar.
Hadton Sabado, Setyembre 16, 2023, hi Llamado ug an iya misis in nakadto han ira umhanan ha Brgy Anagasi han tigda la may nagkaabot nga armado nga kalalakin-an ngan ginpaarakan hin bala an kapitan del barangay rason han iya kamatay.
Hinsabutan nga hi Llamado in anay kaapi han mga rebelde nga New Peoples’ Army nga sumurender pira na ka tuig an nakalabay ngan nagdaog ka kapitan. Hiya in nadalagan utro pagkakapitan ha tiarabot nga piniliay.
Gintotoohan han mga otoridad nga mga rebelde nga kumunista an nagpapaluyo han pagpatay kan Llamado ug ini in mahugot nga ginkondenar han PNP Regional Office. Hi Llamado in makusog nga tagsuporta han Task Force ELCAC o Ending LocaL Communist Armed Conflict.
Samtang, hadton aga han Lunes, Setyembre 18, an barangay tanod nga hi Dacles in namatay han pusilon hin waray hikilal-i nga suspetsado ha basketbolan han Sitio Fernandez, Brgy Cataydungan, San Jose de Buan, Samar.
An bugto nga babaye han biktima in nagsumat ha kapulisan nga pinusil hi dacles han suspetsado nga armado hin pistola.
Kadagmitan nga umiskapo an gintatahapan kataliwan han krimen.#
