Isumat.com/9:25AM,May 9, 2020
Pastilan ini nga SAP…. damo-damuan gud it kontrobersya hini…mga alegasyon hin paboritismo, deri natatagan, kapitan nga nagmalmal hin pusil…yana naman adi hin kapitan nga nakamatay dara la hini nga ayuda pinansyal.
Maatubang yana hin sapin-sapin nga mga kaso hi Andres Cruz, 46 anyos ngan Brgy Captain han Sherwood, Albuera, Leyte han iya patayon pinaagi hin pagpusil an usa nga residente han iya barangay nga ginkilala kan Paulito Paton-og, 39 anyos.
Sumala han report han Albuera Municipal PNP, hadin nag-agi nga adlaw hi Paton-og upod an iya sangkay ngahi Jaime Agcang an pumakadto ha balay ni Cruz basi umaro hin certipikasyon tikang han kapitan komo rekesitos han SAP.
Dida hini nga takna, tigda la nga ginbulnot ni Cruz an pistola nga nakasuksok ha iya hawak nga pinusil an biktima upat ka beses ngan naigo ini ha magkalainlain nga parte han iya lawas. Nagmamalatumat an police blotter nga waray man natabo nga argumento o rason basta tigda na la nga ginpusil ni kapitan an biktima.
Kadagmitan gindara ni Agcang an iya sangkay ha OSPA Medical Center ha Ormoc City pero binawi-an hi Paton-og han iya kinabuhi samtang gintatambal hiya.
Kadagmitan naman nga gin-aresto han kapulisan hi Cruz ngan gin-aandam na yana an mga kaso kontra ha iya.
Nakuha han mga imbestigador an gin-aalegar nga kalibre 45 nga gingamit han krimen ug duha nga mga bala. # (KEVIN SIOSANA)
