Isumat.com/Hulyo 12, 2021
Usa nga kapitan hin barangay ha Northern Samar ngan usa nga kaapi han New Peoples Army an nagkamamatay ha magkalain nga panhitabo hadin nag-agi nga Sabado (Hulyo 10) ngan Domingo (Hulyo 11)
Dida han impormasyon nga nahikay han Isumat.com, ginkilala an biktima nga hi Crispin Mordido, 37 anyos, may asawa, residente ngan Punong-Barangay han San Andres, Las Navas, N. Samar.
Dida han inisyal nga imbestigasyon, gintotoohan nga an mga suspetsado nga nagpanmumusil kan Mordido hadton pasado alas dose han udto in mga miembro han terorista nga grupo.
Padayon an mga tinubyanan han balaud paghalpat han mga suspetsado han krimen.
Samtang, usa naman nga NPA rebel an naawat an kinabuhi ha enkwentro han mga kasundaluhan ug han mga kumunista ha Brgy San Andres, Borongan City.
Natabo an enkwentro han igkahibalag an mga tropa han 78th Infantry Battalion hin porlomenos 15 nga mga rebelde. Nagbalyu-ay hin bala an magkaluyo nga panig ngan namatay an usa nga kumunista. Waray nasamad o namatay ha panig han gobyerno.
Nakuha han mga sundalo dida han lugar in usa nga M-16 rifle, magazine, backpack, sundang, duyan ngan kaldero.
Natabo ini nga aragway katapos hin upat ka adlaw tikang han pag-ambush han mga rebelde ha Jipapad, E. Samar kun diin usa nga sundalo ngan tulo nga CAFGU an nagkamamatay. Ini nga insidente in ginkondenar hin magkalainlain nga sektor tungod han brutal ngan paggamit hin landmines han mga terorista. #
