Isumat.com/7:21AM, Enero 13, 2021
Namatay in usa nga kagawad han barangay han malumos hiya samtang nanginginano han ira kahayupan ngan propyedad didto ha Las Navas, Northern Samar.
Dida han post ha social media han Barangay Kapitan han Del Pilar, Las Navas, iya iginsumat nga nalumos hi kagawad Nerio Cabe Sr samtang ginpapanginano an ira kakarabwan. Nagsering pa an kapitan nga nadistroso han babaha an mga kahumayan ngan mga tanum ha ira lugar.
Ini an ikaduha nga binawi-an hin kinabuhi ha Eastern Visayas tungod han maraot nga panahon han nag-agi nga pira ka adlaw. Naha-una hini an kalumos hin lalakihay han malunod an ira sinasakyan nga motorboat ha kalalawdan samtang tipa-uli hira tikang ha Dolores ngadto ha San Policarpo, Eastern Samar hadton Sabado.
Tobtob yana, Enero 13, kadam-an pa nga barangay ha Northern ngan Eastern Samar an mayda pa mga pagbabaha. Subay han report han Office of Civil Defense kakulop, haros Dos Mil katawo an ginpabalhin ha mga evacuation centers.
Nagpapadayon naman an DPWH ha clearing operations han mga natabo nga landslides nga nakapwersa pagsara han pira nga national highways ha Eastern Samar ngan Southern Leyte.
Nagpahayag naman an Department of Agriculture nga dida han ira inisyal nga pagbanabana, porlomenos 130 Milyones Pesos an balor han nadistroso ha sektor han agrikultura ha rehiyon tungod han maraot nga panahon.
Iginpatapod han ahensya nga kun magma-upay na an kahimtang han panahon, magdidistribuer hira hin mais ngan humay ngadto han apektado nga mga parag-uma. #
