Isumat.com/Mayo 21, 2021
Ha luyo han paningkamot han mga Calbayognon nga humunong na an bayolente nga panhitabo ngan panmatay ha ira syudad, natabo yana nga adlaw, Mayo 21, an pagpatay hin usa nga kagawad hin barangay.
Dida han notisya han The Calbayog Journal, pinusil ngan namatay kanina han maagahon hi Jimmy Boltron, kagawad han Brgy Carayman, Calbayog.
Dida han inisyal nga impormasyon, hi Boltron in nakadto han kusina han ira balay han tigda la sumulod an waray kakilal-i nga suspetsado ngan pinusil an biktima.
An kapulisan in padayon nga nag-iimbestigar han panhitabo.
Kun manunumduman, katapos nga mamatay hi anay Mayor Ronald Aquino dida hin madugo nga insidente sobra na duha ka bulan an nakalabay, an mga Calbayognon in pira na ka beses nagdumara hin aktibidadis upod na an mga rally basi igduso nga magin mamurayaw na an ira lugar.
Hi Aquino in binawian hin kinabuhi hadton Marso 8 kun diin nahilambigit in pira nga tinubyanan han balaud ha iya kamatayon. . #
