Isumat.com/9:00AM, July 7, 2020
Waray la gihapon diskanso an panmaligya hin iligal nga droga ngan bisan kun damo an nagkakadakop, padayon an iligal nga negosyo ug nadadabi pa gud in mga opisyal han barangay.
Ha Baybay City, Leyte, usa nga barangay kagawad an na-aresto han mga tinubyanan han balaud dida hin buy-bust operation ha Brgy Hipusngo kakulop han aga. Ginkilala an suspetsado ngahi Marco Antonio Villacorte, 32 anyos, may asawa, ngan kagawad han Brgy Zone 20.
An mga operatiba han PDEA, Baybay PNP ngan Leyte Provincial PNP an nagburublig basi masikop an suspetsado nga gintutudlok nga High Value Target.
Nakapalit an mga pulis hin upat ka sachet hin gin-aalegar nga shabu may balor nga 16 Mil pesos. An suspetsado in maatubang hin kaso dara han iya pagtalapas han Republika Acta 9165.
Pira pala ka adlaw an nakalabay, nahi report an ka-aresto hin usa nga Municipal Councilor han Babatngon, Leyte dara gihapon han iligal nga droga. #
