Isumat.com/12:43PM, Enero 19, 2021
Usa nga barangay kapitan ha Alangalang, Leytre an gibabag-uhi nga biktima han mga kaso hin panmatay ha Rehiyon Otso.
Pasado alas 7 han aga, Enero 19, an biktima nga ginkilala nga hi Benjamin Padullion, in ginpanmumusil ngan namatay samtang hiya in nagmamaneho hin motorsiklo ha national highway ha Brgy Bobonon, Alangalang, Leyte. Hi Padullion an kapitan ha Brgy Cambahanon han nasabi nga bungto. Hiya in 65-anyos ngan inasaw-an.
Subay han inisyal nga imbestigasyon, temprano pa han aga, hi kapitan in pumakadto ha Bungto han Sta Fe basi pumalit hin medisina. Han tibalik na hiya ha ira, gingamaan hiya hin duha nga suspetsado nga sakay gihapon hin motorsiklo.
Nagpahayag pa an imbestigador nga waray pa katutudlok kun ginsundan hi Padullion han mga suspetsado o gintapo hiya ha kalsada. Nagpahayag pa an mga otoridad nga pistola an gingamit han pagpusil.
Tobtob han ginsusurat ini nga notisya, ginpapanginano pa han mga imbestigador kun ano an mga posible nga anggulo ngan pangilal-an han mga suspetsado hini nga krimen. #
