Isumat.com/8:07PM, May 29, 2020
Nagsusunod-sunod an mga tawo nga tikang ha Rehiyon Otso nga natatapnan han corona virus.
Dida han gibabag-uhi nga advisory han DOH Regional Office nga ginpagawas alas 8 yana nga gab-i, mayda na liwat tulo ka tawo an bag-o nga nagpositibo han COVID-19. Hinungdan hini, 39 na katawo an natapnan ha bug-os nga rehiyon.
An mga bag-o nga nag positibo in taga Jaro, Leyte nga lalaki, 21 anyos; samtang an duha in mga kababayen-an nga taga Tarangnan, Samar.
Hira in lakip han 160 ka tawo nga ginkuhaan hin laboratory test han EVRTC. 157 an negatibo ug hira nga tulo an positibo han virus.
Waray mahisumat han DOH kun tikang ba ha Manila o Cebu ini nga taga Jaro o dida la nag-inukoy han ira bungto. # (KEVIN SIOSANA)
