Isumat.com/7:12PM, June 13, 2020
An Ormoc City an nakadara han gidadamu-i nga nagpositibo han COVID-19 yana nga adlaw (Hunyo 13) ha Sinirangan Bisayas.
Ini in dara kay dida han 66 nga bag-o nga Positive Cases, 30 hini an tikang ha syudad han Ormoc. Ini in subay han latest result han swab samples nga ginpa-ilarum han confirmatory test ha EVRTC kun diin 245 nga samples an ira ginproseso.
An bungto han La Paz in nadugangan hin bag-o nga 9 nga kaso; samtang an Catbalogan City in nagrehistro gihapon hin 9 nga nagpositibo han virus.
An munisipalidad han Bato, Leyte in may kadugangan nga 7 nga kaso.
An bungto han Libagon, Southern Leyte in nahi-upod na ha mga listahan han mga may natapnan han virus kay 3 nga ira residente an natapnan; samtang may bag-o nga 2 nga kaso an Pastrana, Leyte.
An Eastern Samar in deri na Covid-Free kay mayda 1 nga nagpositibo ha bungto han Mercedes. Usa ini nga lalaki nga OFW. Umabot ini ha Cebu ngan didto naabtan han lockdown. Nakabalik hiya ha Region 8 pinaagi hin pagsakay hin barko para Hilongos. Ginkuha hiya han behikulo han LGU ngan iginderetso ha Isolation Facilty han bungto. Pero subay han impormasyon tikang ha Eastern Samar Provincial Health Office, igbabalhin an pasyente ha EVRMC.
Mayda gihapon syahan nga kaso an San Sebastian, Samar; ngan syahan liwat nga kaso para han Tabontabon, Leyte.Mayda naman tag-urusa nga bag-o nga kaso an Tacloban City, Baybay City, ngan Abuyog, Leyte.
An DOH in maghahatag hin kadugangan nga detalye ha masunod nga mga oras. Hapagkayana umabot na 198 katawo han rehiyon an na-alakbatan han virus. #
