Nadugangan hin duha ka tawo an ihap han mga nag positibo han COVID-19 denhi ha Eastern Visayas. Ini an iginpahayag ni DOH-Region 8 Director Minerva Molon ha usa nga press conference yana nga alas 10;25 han aga, Abril 7, 2020.
An mga samples hini nga duha ka tawo in lakip han 35 nga samples nga iginpadara ha Cebu para han laboratory testing hadton abril 3. An 33 nga samples in negatibo han virus.
Nagsumat hi Molon nga ini nga bag-o nga positive cases in ngaduha tikang ha Tarangnan, Samar. An usa in babaye nga 56 anyos, samtang an usa in 32 anyos nga babaye nga taga Tarangnan gihapon.
Ini hira in iginka-urusa han lalaki nga 63 anyos nga taga Calbayog City nga nag positibo han una nga semana. Hira man gud ngatanan in nagtatrabaho ha Tarangnan Community Hospital. An usa hini in Administrative Officer samtang an usa in health worker han hospital. Hapagkayana, iginbabalhin na hira tikang ha Samar tipakadto han referral hospital nga amo an EVRMC.
Iginpahayag pa ni Molon nga stable an kahimtang yana han duha, pero kinahanglan igbalhin ha referral hospital basi matutukan an pagtambal ngan makalikay hin pagtapon ha iba. Ginbubuhat gihapon yana an contact tracing han iginka-urusa nga mga tawo hini nga bag-o nga duha nga nag positibo.
An bungto han Tarangnan in iginpa-ilarum na yana hin istrikto nga kwarentina ngan ngatanan nga tawo didto in ginkokonsiderar nga Persons Under Monitoring.
Tobtob yana, upat na ka tawo an nagpositibo han virus denhi ha Region 8. An syahan an taga Catarman nga babaye nga natambal na ngan nakagawas na ha hospital, an ikaduha an taga Calbayog nga lalaki nga aadto pa ha hospital ug ini nga duha nga bag-o nga tikang ha Tarangnan nga iginka-usa han taga Calbayog. #
(Posted 10:48 AM, April 7, 2020)
