Tinikangan yana nga adlaw, Hunyo 17, 2020, waray makakasulod bisan hin-o labot la han otorisado nga mga personales ha probinsya han Biliran.
Hi Governor Rogelio Espina in nagpagawas han Executive Order No. 30 nagmamando han Pre-Emptive Closure ha ngatanan nga lugar kun diin puede agi-an pagsulod ngadto han lalawigan. Ginklaro ni Espina nga kinahanglan niya ini buhaton basi kapanalipdan an mga Biliranon han peligro nga maglarab an COVID-19 ha ira lugar.
Sumala han gobernador igpapasunod an Border Closure samtang deri pa natatapos an contact tracing han mga Positive Cases labi na gud an mga Health Personnel ha EVRMC. Nababaraka an opisyal nga kun deri matudlok an mga tawo nga iginka-urusa han mga nag positibo, mabutho an kataragman nga may magkakatapnan nga mga Biliranon.
An Tacloban City an Regional Capital han Sinirangan Bisayas ug damo nga Biliranon an napakadto han syudad para hin magkalainlain nga rason, sanglit mas maupay kun deri la anay tugutan nga makabiyahe ngan makasulod an hin-o man ngadto ha Biliran. Pahayag pa han gobernador, kun magtikadamo an kaso han COVID ha iya probinsya, deri ini maakos han nag-uusaan la nga Provincial Hospital ngan deri bastante an kadamo han ira medical workers.
An exempted la hini nga kamanduan amo an mga emergency situation, mga tauhan han hospital, mga kaapi han PNP ngan BFP, an nagdedeliber han panguna nga produkto ngan mga tawo nga tatagan hin otoridad han Provincial Government.
Iginmando gihapon ni Espina nga magkaada hin curfew an ngatanan nga bungto han Biliran tikang 10 han gab-i tobtob alas 4 han maagahon. Partikular nga ginpasaraduhan ni Espina an Biliran Bridge, mga pantalan han mga bungto, an airport ug an puede du-ongan ha mga coastal barangays.
Ini nga kamanduan in magigin epektibo tinikangan Hunyo 17 tobtob nga maklaro na an sitwasyon ha EVRMC ug an contact tracing.
Hapagkayana, upat na katawo han probinsya an nagpositibo han corona virus ug aadto ha Isolation Units. Hira ngatanan in maupay an kahimtang han panlawas. # (KEVIN SIOSANA)
