Isumat.com/Pebrero 22, 2022
Duro gud hin katalagsaon para ha mga Pilipino nga magkamay-ada hin “blue eyes.”
Sanglit kun mayda Pinoy nga sugad hini an kolor han mata, napapa-usa gud kita ngan sugad sugad nga nakakasaksi kita hin tawo nga tikang ha iba nga kalibutan.
Dida han notisya han Cebu Daily News (CDN) Digital, hinsabutan nga didto ha Hinundayan, Southern Leyte an 6-anyos nga babayehay nga gin-alyasan la ha ngaran nga “Kulot” in nagtatag-iya han makaruruyag ngan maanyag nga blue eyes.
Ini nga babayehay in nakit-an ni Nico Adam han magbuhat an ira grupo hin relief operations han mga biktima ni bagyo Odette didto han nasabi nga lugar.
Ha atubangan han ira kasagipo han panhatag han hinabang, naka-agaw gud han ira atensyon an kolor han mata ni Kulot. Sering pa ni Nico, kun imo tututukan an mata han bata, alagid-agid nga nasulod ka hin bintana ngadto hin “blue galaxy in space.”
Nanmaki-ana hi Nico didto han mga paryente han bata ug iya nabaru-an nga waray dugo hin langyawanon ngan syento porsyento nga Pilipino an ginikanan nga pamilya ni Kulot.
Katapos nga magin bantuganan hi Kulot ha social media, usa nga espesyalista ha mata an nakigsumpayan ha pamilya ni Kulot basi igpa-ilarum ha medikal nga panginano an kahimtang han iya mga mata.
Sumala pa han Cebu Daily News, kadam-an na nga may bulawanon an kasingkasing nga indibiduwal an naghatag hin ayuda ngadto han pamilya ni Kulot, ngan pinaagi han mga donasyon makakabulig ini para han eye check-up.
Sering pa ni Nico, an nanay han bata in maiha na nga karuyag igpa-check-up an mata han iya anak basi masabutan kun ano an kahimtang ug an posible nga problema ha maabot nga mga panahon. #
