Pangungunahan na ni Brigadier General Bernabe “Joel” Balba an bug-os nga pwersa han kapulisan ha Sinirangan Visayas. Subay han General Orders nga ginpagawas han PNP National Headquarters ha Campo Crame, epektibo an nasabi nga direktiba kakulop nga adlaw, Marso 19, 2020.
Nakapatik dida han kamanduan nga hi Balba an maliwan kan BGen Ferdinand Divina komo PNP Region 8 Director. Hi Divina amo naman an magigin Acting Director for Intelligence han PNP. Kun aton manunumduman, an hepe han PNP Intelligence amo hi General Mariel Mangaway nga aadto pa yana ha hospital dara han karamtan ha lawas nga iya gin-antos dida han helicopter crash ha Laguna.
Hi Balba in anay hepe han Eastern Police District ha Metro Manila, nagin Deputy Director for Administration PNP-CIDG ngan nagin hepe han Manila Police District.
An bag-o nga PNP Region 8 Director in kaapi han Philippine Military Academy “Maringal” class of 1988 kun diin iya mga ka-batch hira Divina ngan anay PNP 8 chief Dionardo Carlos. #
