Isumat.com/Hunyo 8, 2021
Waray la anay magkakatitirok ngan magtatagay-tagay ha mga bars, beer house, nightclub, KTV ngan videoke bars ha syudad han Tacloban.
Hi Mayor Alfred Romaludez in nagpagawas hin kamanduan para hin usa ka semana nga suspensyon han operasyon han nasabi nga mga establisemento. Ini nga kasugu-anan in epiktibo Hunyo 8 tobtob Hunyo 15.
Iginmando gihapon han LGU-Tacloban nga sadhan an Payapay Coastal Road sugad man an kalsada ha Manlurip, San Jose. Deri puede umagi an mga tawo ngan sarakyan han nasabi nga mga dalan tisulod o tigawas han Tacloban tobtob nga deri ginbubulkas ini nga mando.
Abri naman para han transportasyon tisulod ngan tigawas ha Tacloban an mga borders ha Pawing, Imelda Village, Tagpuro ngan San Juanico Bridge.
Naha-una na nga nagmando hi Romualdez pagderi hin mga katitirok sugad han mga parties.
Naghimo hini nga pitad an gobyerno han syudad tungod han padayon nga pagsaka han ihap han mga nagkakatatapnan han Covid-19. Dida han Hunyo 7, an Tacloban in mayda 315 nga Active Cases.
Samtang, deri makakabalik ngadto ha probinsya han Biliran an mga Locally Stranded Individuals (LSI).
Nagdesisyon an Provincial Task Force nga tikang Hunyo 8 tobtob Hunbyo 24, temporaryo nga deri makarawat hin LSI an lalawigan. Ini in dara han nagtitikadamo nga pasyente han Covid ha ira lugar ngan puno na an mga quarantine facilities.
Kasumpay hini, hi Gobernador Gerry Espina in mahugot nanawagan ha mga barangay officials nga mag istrikto gud han pagpasunod han mga health protocols ha ira mga nasasakupan.#
