Namimintana yana an posibilidad nga ha diri maiha nga panahon, igkakaparayaw han Siniringan Visayas in usa nga de-kalibre nga player ha triathlon pinaagi han 9-anyos nga hi Yvaine Delos Reyes Osias nga ha iya duro hin kabatan-on nga pangidaron ngan pamigura in wala too na an paghakot hin mga medalya ha mga kompetisyon.
Ha bug-os nga Rehiyon Otso, hi Yvaine amo an gintutudlok yana nga numero uno nga triathlete ha iya kategorya nga Girls 12 & Under Division. Dida han ginbuhat nga 2019 Ormoc Aquatic Edge, iya iginlampaso an iya mga karibal bisan kun hira in tag dose anyos na ngan maiha na nga nag-iinapi hin mga triathlon events samtang hi Yvaine in sobra pala usa ka tuig hini nga paisan-isan.
Dida han 2019 Alaska Ironkids ha Subic Bay, na-angkon ni Yvaine an ika-walo nga pwesto dida han iya dibisyon nga ginpartisiparan hin sobra otsenta nga mga magkarit nga triathletes han Pilipinas ngan iba nga nasud, sanglit nagawas nga hapagkayana, hiya an Rank #8 ha aton nasud.
An triathlon in paugnat ha kusog kun diin mayda tulo nga sunod-sunod kompetisyon an pagmumulayon. Syahan an paglangoy, susundan han pagbisekleta ug an katapusan nga hugna amo an dadlaganay.
Labot la han pagigin triathlete, an Grade 4 pupil ha STEFTI-Tacloban ngahi Yvaine in nagpapasundayag han iya kamakarit ha swimming kay dida han 2019 City Meet, naangkon niya in tulo nga gold medals ha swimming.
Han yana nga Enero, nakab-utan gihapon niya an triathlon gold ngan duha nga swimming gold medals han Tacloban City Batang Pinoy Games.
Hiya in nakatalaan nga magmulay para han Tacloban City team dida hiton tiarabot nga Eastern Visayas Regional Athletic Association o EVRAA Meet ha Burauen, Leyte hiton Marso ha larangan han swimming. Kataliwan hini, mapakadto hiya ha Subic para han iya ika-tulo nga pag-api han Ironkids, ngan ugsa matapos an 2020 makikigpaprumba hiya ha Triathlon dida han Batang Pinoy National Games.
Mismo hi Frank Lacson, an ginkikilala nga “The Legend” han triathlon denhi ha Pilipinas an nagpahayag nga dako hin duro an potensyal ni Yvaine nga magin world-class player. Hi Lacson in personal nga nakasaksi han abilidad han Taclobanon han duha ka beses nga pagmulay ni Yvaine ha Ironkids. Hiya in duro an pagdayaw kan Yvaine sanglit nakasering hiya nga “this kid is amazing.
Sumala kan Rommel Osias nga amo iton tatay ni Yvaine, hi Lacson in nagkikinumbinsiron ha ira nga pabalhinon hin pag-eskwela hi Yvaine harani ha Subic kay hiya mismo it personal nga magigin coach han batan-on. Bisan ngani an mga swimming coaches ha Laguna kun diin adto liwat nag-eensayo an gigkakariti nga mga swimmers , in naghangyo liwat didto ha ira mag-training hi Yvaine.
An mga kag-anak ni Yvaine in nagpabati hin hul-os nga suporta para han ira anak ngan kun magdedesisyon hiya nga masentro gud hiya ha triathlon, bubuhaton nira an ngatanan bisan pa hira lumakat tikang denhi ha Tacloban ngadto ha Subic basi la matuman an hingyap han ira anak.
