Isumat.com/Pebrero 11, 2022
Tinood ba an mga notisya nga an mga kalalakin-an ha Brgy Mahayag, Sta Margarita, Samar in deri na nag-uukoy didto han nasabi nga lugar?
Ini nga isyu an panginginano-on han kapulisan kun mayda ba kamatuoran ngan kun tinood man ini, ano an nagin hinungdan nga ginbayaan han kalalakin-an ira barangay.
Hi PLt Lorben Deraco, Chief of Police han nasabi nga bungto in nagpahayag nga maghihimo hira hin pitad basi makumpirmar kun may kamatooran an mga notisya hin katatapuran nga mga surok nga deri na na-ukoy ha Mahayag an mga kalalakin-an tungod han ira kahadlok nga mahilambigit hin kasamok.
Hi Deraco in na-interview han iFM-RMN Tacloban, Pebrero 10, ngan iya iginpasarig nga mag-iimbestigar an iya mga tauhan hini nga kahimtang.
Gintotoohan nga ini nga barangay in ginhihimo nga kuta hin magraot nga elemento nga nadadabi hin bayolente nga panhitabo sugad hin panmatay dida han bungto ngan pira nga lugar ha 1st District han Samar. Tungod hini, nababaraka an mga kalalakin-an nga bangin hira an paglabtan hini nga mga grupo bisan kun waray hira labot hin bisan ano nga pagkabirubingkil.
Sumala kan Deraco, ini nga barangay in aadto ha bukid ngan deri konkreto an kalsada ngadto sanglit makuri gud an transportasyon, sanglit posible nga adto nagpupugad an mga suspetsado han mga panhitabo nga deri maupay dida han bungto.
Nagsumat pa an opisyal nga mayda na mga sundalo nga iginpasarang didto hini nga lugar basi mabalabgan an pagliyong-liyong han armado nga mga grupo ngan madakop ini nga mga suspetsado. An mga sundalo in tikang ha Mindanao nga ginhangyo han 8th Infantry Division nga bumulig ha Rehiyon Otso pagpoypoy han mga private armed group nga nagigin aktibo labi na ha Samar kun panahon han eleksyon.
An Sta Margarita in ginkokomponer hin 36 nga barangay ngan sobra napulo in aadto ha tay-aw nga lugar labi na an Mahayag, sering pa ni Deraco.
Ha deri pala maiha, nagsumat an Calbayog Journal nga mayda naghatag ha ira hin impormasyon nga an mga kababayen-an nala ngan kabataan an nagpupuyo ha Mahayag ngan waray na an mga kalalakin-an ukoy didto. #
