Isumat.com/2:46PM, June 2, 2020
Ha panuyo nga mas magin epektibo ngan matulanoy an pag-implementar hini, ginpahunong la anay an Balik-Tacloban nga programa han syudad.
Sumala kan Dr. Gloria Fabrigas, City Health Officer han Tacloban, damo na hin duro an nagpa rehistro para hini nga programa ngan kinahanglan matapos anay han ira opisina an assesment han naha-una nga nag-apply antis igpadayon ini nga aktibidad. Nagsering hi Fabrigas nga hapagkayana, naabot na hin 1700 an katawhan an nagpalista basi makatagamtam hini.
Ginklaro han opisyal nga “on-hold” la anay an Balik-Tacloban basi matagan hin tim-os nga atensyon an pagmonitor han mga nakabalik na ug an natagan na hin clearance nga makaka-uli. Hapagkayana, 151 katawo na an nakabalik ha ilarum hini nga programa. Iginsumat pa ni Fabrigas nga sobra katunga hini ha ira in ginkuhaan na hin swab test ngan negatibo ha corona virus an laboratory result.
An City Health Office in nagdudumara man gud hin assesment han kahimtang han kada aplikante. kakadtu-on anay an balay ug makikig-istorya han pamilya kun makakasunod ba hira han mga patakaran han Home Quarantine, ug kun deri puede, didto ha Quarantine Facility han syudad an kwarentina han mabalik nga tawo.
Kasumpay hini, nanawagan utro hi Fabrigas ha mga nagpakabalik na nga tim-os gud nga pagsundon an mga patakaran nga ginkasarabutan para han ira Home Quarantine. Ini in ha atubangan han pagkabaraka han publiko nga magsarang an kagaw dara han nahisumat nga pagtalapas han mga health protocols han mga Balik-Taclobanon.
Kakulop, an usa han Balik-Taclobanon in nahisumat nga nakig-irignom han iya kasangkayan, ngan mismo hi Fabrigas in nagbuyagyag nga mayda usa pa nga gumawas han balay pero maupay nala kay nasabtan han barangay officials dara han tag ha iya butkon nga tigaman komo Returning Resident.
Nagwarning hi Fabrigas nga kun mayda pa magpinasaway nga mga Balik-Taclobanon maatubang na hira han kaangayan nga kaso.
Waray liwat igsumat ni Fabrigas kun san-o igpapadayon an proseso han Balik-Tacloban. Iya ginklaro nga an Balik-Tacloban in inisyatibo han City Government para han mga residente han syudad nga na-stranded han lockdown ha iba nga lugar. Ini nga programa in lain la han Balik-Probinsya Program han Duterte Administration.
Mahugot gihapon nga pinanhimuwa ni Fabrigas an mga iru-istorya nga nagkagawas ha social media kakulop nga mayda na daw nag positibo han virus nga taga Tacloban. Dara hini, utro hiya naghangyo ha publiko nga deri magapasarang hin peke ngan waray beripikasyon nga mga impormasyon.
Igindig-on gihapon ni Fabrigas nga bisan hin-o nga tawo tikang ha iba nga lugar in puede makasulod ha Tacloban basta kumpleto an iya mga papeles ngan deri tikang hin lugar nga mayda community transmission han covid-19. # (KEVIN SIOSANA)
