Isumat.com/8:02AM,May 12, 2020
Mahugot na yana an pangandaman han Gobyerno Probinsyal han Leyte mahitungod han programa nga Balik-Probinsya, Balik Pag-asa nga ginpahimugso han administrasyon.
Kasumpay hini, naghihimo na yana hin mga pitad an LGU-Leyte ha panguna ni Gobernador Mic Petilla labi na an pagtukod han mga Isolation Centers para han magkaka-uli nga mga Leyteno. Mismo hi Petilla an nagkumpirrmar nga an lalawigan amo in usa dida han lima nga probinsya nga hihimoon nga “Pilot Areas” ha implementasyon han mao nga programa.
Dida han Mayo 7, hi Presidential Spokesperson Harry Roque an nagtudlok han Leyte upod in pira nga probinsya nga mahilalakip dida han Pilot Implementation han programa nga may panuyo nga ma-ibanan an duro hin kadamo nga populasyon ha Metro Manila.
Manlilimbasog an Provincial Government nga matagan hin pakabuhi o trabaho ini nga magkaka-uli, pahayag ni Petilla. Dara hini, nakikigsumpayan na an iya opisina ha magkalainlain nga sektor para han job opportunities han magkakabalik.
Ini nga mga pakabuhi an ig-aandam para han mga mauli nga waray trabaho nga dadangatan denhi ha Leyte.
Gin-aandam gihapon han probinsya an pagbutang ha Isolation Areas han mga Leyteno nga na-stranded ha Manila tungod han lockdown sugad man an mga mangunguli nga Overseas Filipino Workers. # (KEVIN SIOSANA)
