Isumat.com/Hunyo 20, 2023
An Borongan City in naghimo hin kasaysayan komo gisasyahani nga Local Government Unit (LGU) ha bug-os nga Pilipinas nga nagtindog hin facilidad ha airport pinaagi han ira kalugaringon nga pondo ngan deri tikang ha gobyerno national.
Ini nga facilidad amo an bag-o nga Departure Terminal Building nga pormal gin-abrihan kakulop, Hunyo 19, 2023 nga gintambungan han mga opisyales han LGU, probinsya han Eastern Samar, Civil Aviation Authority of the Philippines (CAAP), Consulate General of Japan ngan iba pa mga bisita.
An nasabi nga terminal building in ginlugaringan han LGU nga tindugon ha panuyo nga magin conveniente ngan maka-akomodar hin darudamo nga pasaheros. An facilidad in para hin 120 nga indibiduwal ngan nagkakantidad hin 10 milyones pesos.
Tungod gihapon han paningkamot han LGU, waray magdugay an paghimo hini kay natapos an building ha sulod la hin tulo ka bulan.
Ha iba nga mga airport han nasud, an CAAP an naghihimo han sugad hini nga mga facilidadis, pero tungod han panlimbasog han LGU ha panguna ni Mayor Jose Ivan Dayan Agda, nagin hapsay an konstraksyon han mao nga facilidad.
Labot la han terminal building, nagtikang na gihapon yana nga semana an operasyon han air cargo facility han Philippine Air Lines nga maghahatag hin iwag basi mahikarga an mga produkto han Borongan ngan Sinirangan Samar ngadto ha iba nga lugar.
Kakulop, ha syahan nga higayon nahikarga an produkto han isda nga tuna tikang ha Borongan City ngadto ha Cebu.
Dida han iya mensahe, gintagan hin du-on ni Agda nga nagin malinangpuson an proyekto tungod han nagkaka-urusa nga hingyap ngan panlimbasog han mga Boronganon. Nanawagan hiya ha mga mulopyo nga singabuton an oportunidad hini nga mga flights pinaagi han investment ha negosyo.
Sumala pa han alkalde, ini in kamatu-oran na ngan deri na la inop sanglit kinahanglan an kooperasyon ngan paniguro han ngatanan basi magdurot ini hin kauswagan ha Borongan ug ha bug-os nga probinsya.
Hi Hideki Yamaji, Japanese Consul General, in nagsering dida han iya Keynote Message nga importante hin duro an pagkaada hin byahe han eroplano labi na ha hagrayo nga mga lugar kay dako an kontribusyon hini ha pagpa-ursa han ekonomiya.
iya iginpananglitan an sitwasyon ha Japan nga damo an mga lugar ha mga isla pero naningkamot an ira gobyerno nga magkaada hin mga airports basi makabiyahe an mga eroplano nga amo an nagin susi han pagtika-upay han ekonomiya han nasabi nga mga lugar.
Hi Eastern Samar Governor Ben Evardone in naglalaum naman nga unta ini nga nahimo han Borongan in magin modelo ngan himoon nga susbaranan han iba nga lugar. Iya pa igindugang nga an Borongan Airport in simbolo hin progreso ngan kooperasyon.
Ha mensahe ni Eastern Samar Rep. Maria Fe Abunda, iya gindig-on nga an sugad hini proyekto in nagigin mabinungahon kun aada ha kasingkasing an pagpaka-upay han kahimtang han katawhan.
Iginpabati naman ni CAAP Chief Manuel Antonio Tamayo an mapaso nga paglamano ngan pagdayaw ha LGU-Borongan tungod han ira pangalantas pagtukod han nasabi nga facilidad.
An Borongan Airport in nagtikang han ira operasyon han ruta nga Manila-Cebu-Borongan hadton Disyembre 2022. Ha pahayag ni Borongan City Flights Operations Chairman ngan City Information Head Rupert Ambil, nagkaada na hin sobra 4 mil nga pasaheros an nakagbiyahe pinaagi hini nga airpot tikang han pag-abri han flights han nakalabay nga tuig.
Malipayon nga iginkadasig ni Ambil an damo nga pasaheros han airport nga darudamo kun igkukumparar ha mga operasyon han syahan nga pira ka bulan han gin-abrihan nga iba nga airports.
An nasabi nga aktibidad in kaparte han pagtigaman han 2023 Borongan City Charter Month.
