Isumat.com/6:32AM, November 3, 2020
Namatay in usa nga babaye han malumos hiya ha kadagatan ha Samar durante han pagtampalo ni Bagyo Rolly ha pira nga parte han nasud hadton Nobyembre 1, 2020.
Dida han impormasyon tikang kan Samar Governor Reynolds Michael Tan, an biktima in ginkilala nga hi Elena Apolinario, residente han Brgy Ilo, Sto Nino, Samar. Nagpahayag pa hi Tan nga nalumos an biktima harani han kabaybayunan han ira lugar.
Hi Apolinario in may sakit nga dementia ngan subay han eksaminasyon han Rural Health Unit, kalumos an rason han iya kamatay. An isla nga bungto han Sto Nino in usa han mga munisipalidad han probinsya nga nahilakip han Typhoon Signal Number 3 tungod han bagyo.
Samtang, nakabalik na ha ira tagsatagsa nga puy-anan an sobra 8 Mil katawo nga nag-evacuate ngadto hin talwas nga mga lugar dida han bagyo. Nagsering hi Lord Byron Torrecarion, Regional Director han Office of Civil Defense-Eastern Visayas nga kakulop, Nobyembre 2, ngatanan han evacuees in talwas ngan nagkabalik na ha ira mga panimalay.
Ini nga mga evacuees in tikang ha pira nga parte han Samar, Northern Samar, Eastern Samar ngan Biliran.
Nagsering pa hi Torrecarion nga waray dako nga danyos ha mga straktura ha Rehiyon Otso tungod kan Rolly. Pira nga parte ha Samar an nawarayan kuryente, pero kadagmitan ini nahibalik. Waray gihapon problema ha mga kakalsadahan ngan tulay ha bug-os nga rehiyon, sering pa han opisyal.
Ginpapanginano gihapon han ahensya an nahireport nga pira nga kabablayan ha Brgy Baybay, Catarman, Northern Samar an nagkaguguba tungod han hangin ngan pagsampak han balud.
Igindugang pa ni Torrecarion nga nag-aandam na yana an mga personales han OCD-Eastern Visayas hin pagbiyahe ngadto ha Bicol Region basi umayuda ha relief ngan rescue operations. An nasabi nga rehiyon an grabe nga nadanyos han paglapingka han “super-typhoon”. #
