Lagapak ha hospital in usa nga babaye dara han iya gin-antos nga karamtan ha lawas han mabunggo-an hiya hin ambulansya samtang nag-aaram pagmaneho hin motorsiklo ha national highway ha Brgy. Opong, Tolosa, Leyte.
Sumala han report han Tolosa PNP, sumingabot an 28-anyos nga babaye nga residente han nasabi nga barangay nga magpraktis pagmotor kay nagmimiringaw an kalsada tungod han travel restriction nga gin-implementar yana dara han COVID-19.
Banda alas 4 han kulop, Marso 24, ini nga babaye nga inasaw-an ug may duha nga anak, in nag praktis pagmotor ngan matalabok unta hiya han kalsada sakay han motorsiklo, pero waray hiya makapanginano nga may tipadara-on nga ambulansya sanglit nabanggaan hiya. Hinungdan hini, nag-antos hiya hin mga bun-og ngan panggos ha lawas ngan ulo ngan kadagmitan gindara ha usa nga hospital ha Palo, Leyte para pagtambalon.
An ambulansya in tikang ha Tacloban ngan tipabalik na unta ha Albuera, Leyte. Iginkustudiya anay han kapulisan an driver han ambulansya pero ginpagawas katapos han reglementary period. Nagsaad an driver han ambulansya nga mahatag hiya hin ayuda para han pagpatambal han biktima. #
