Isumat.com/8:36AM, May 28, 2020
Usa nga makangingirhat nga krimen an natabo hadin nag-agi nga adlaw ha Naval, Biliran.
Ginpatay kahuman nga pagluguson in usa nga babaye ha Brgy Santisimo Rosario han nasabi nga bungto. An biktima in ginkilala nga hi Michelle Flores alias Princess Mae, 24 anyos ngan nagtatrabaho ha usa nga karaoke bar.
Subay han report han Naval PNP, usa nga empleyado hin Courier company an nagsumat ha kapulisan nga nakakita hiya hin patay nga lawas hin babaye ha atubangan han ira bodega.
An mga otoridad in kadagmitan pinmakadto han lugar ngan ira nakit-an an babaye nga waray na panapton ngan nakulob dida han may bodega.
Ginsusi han mga imbestigador an CCTV footage ngan didto ira nakit-an nga mayda usa nga lalaki an nagdara han biktima ha atubangan han bodega ngan ginlugos niya ini. Katapos han paglugos, iginmalmal han suspetsado an ulo han babaye ngada han semento nga amo an gintotoohan nga rason han kamatay han biktima.
Labot la han imbestigasyon, nagdudumara gihapon an Naval PNP hin hot pursuit operation basi ma-aresto dayon an suspetsado nga waray pa kakilal-i. # (KEVIN SIOSANA)
