Maatubang yana hin kaso in usa nga langyawanon han magpanisaway ini ha barangay checkpoint ngan nagmalahimo pa hin pangastigo han Brgy Captain nga nangunguna dida han pagbantay han ira lugar.
An Javier, Leyte Municipal Police Station ha panguna han ira hepe, PCapt Ruben Recilla in nagpadangat hin rekomendasyon ha Leyte Prosecutor’s Office para han preliminary investigation han reklamo nga iginsampa kontra kan Mohamed Alajati, 34 anyos, inasaw-an, taga Dubai, United Arab Emirates ngan nag-uukoy yana ha Brgy. Binulho, Javier, Leyte.
Dida han rekomendasyon, an kaso kriminal nga iginpasaka kontra han suspetsado amo an Direct Assault of Person in Authority. Ini nga kaso in igpapa-ilarum hin inquest proceedings han Office of the Provincial Prosecutor.
Ini nga kaso in nahimugso dara han pormal nga reklamo nga iginsalawad ha Javier PNP Office ni Emmanuel Abueva, 44 anyos, nga amo an kapitan han nasabi nga barangay.
Subay han pag-asoy ni Abueva, dida han alas 6:45 han gab-i, Marso 24, hiya upod in pira nga opisyal han barangay ngan mga tanod in naghihimo han panginano han mga tawo nga nasulod ngan nagawas ha ira barangay. Dida hini, hi Abueva in nakakita hin sarakyan nga may plate No. XTR 847 nga tidara-on ha checkpoint. Iya ginpa-ukoy an sarakyan ngan duma-op hiya ngan iya nakilal-an hi Mohamed nga amo an nagmamaneho upod an iya asawa ngan usa nga anak. Han magpaki-ana an kapitan kun tipaka-in hira ngan aro-on an home quarantine pass antis hira tugutan nga makagawas, nagsering la an Arabo nga deri na kinahanglan kay mapalit manla hiya hin sigarilyo. Kataliwan, tigda nagpaharurot han iya kotse an foreigner tikadto ha Brgy Laray, Javier.
Paghagos hin usa ka oras, nasipatan han grupo nira Chairman Abueva nga tibalik na hi Mohamed ug didto naagi han usa nga dalan tisulod han ira barangay. Ira ini gin flagdown ngan ginpahunong an sarakyan ngan ginhangyo nga igpakita an quarantine pass. Dida hini, nagpakita hin pagigin arogante hi Mohamed han iya panmaton han paki-ana ni Abueva ngan nagmalagawas na ini han sarakyan pero ginhawiran han iya misis. Sumala pa han report, nakagawas an Arabo han kotse ngan gindaop hi Abueva ngan nanyabo na ini, pero an mga yabo in nasagang han kapitan.
Nakahimo hi Abueva nga maka bentahe hin posisyon kontra han Arabo ngan pinaagi han bulig han iba pa nga opisyal ngan tanod, ira nakontrol ngan nakaptan an Arabo ngan kadagmitan gindara ha police station. #
