Iginlunsad han gobyerno an “Angat Lokal PH” Facebook page ha pag-arangkada han kampanya para maipasamwak ha publiko an devolution. Nagbuburublig an Dept of Budget & Management (DBM), Dept of the Interior & Local Govt (DILG) ngan Presidential Communications Office (PCO) ha paglunsad han mao nga FB page. An “Angat Lokal PH” FB Page an opisyal nga plataporma ha media ha pagpasabot han mga updates ngan impormasyon kasumpay han Mandanas-Garcia nga desisyon han Korte Suprema hadton 2019, ug an implementasyon han Executive Order 138 ni anay Presidente Rodrigo Duterte nga iya pinirmahan han June 1, 2021. Ini amo an mando han hul-os nga pagpatuman han Full Devolution o pagtubyan hin damo nga mga responsabilidad han gobyerno nasyunal ngadto ha mga Local Government Units (LGU) ha paghatag han panguna nga mga serbisyo ha katawhan .
Komo opisyal nga surok han impormasyon ha media, an “Angat Lokal PH” FB page in magpapakita han mahinungdanon nga mga istorya, videos, infographics, balita, visuals ngan press releases mahitungod han igintalaan nga pagbalhin han poder ngan serbisyo ha kamot han mga LGU . Dara hini nga devolution, naka-agom na an mga LGU hin paghitaas han ira malon tikang han buhis ha nasyunal nga pantag tinikangan han 2022, subay han iginlalarang han EO 138 ngan Mandanas Ruling.
An pagtikadako han malon tikang ha National Taxes in makakagduso ha mga LGU nga mapa-uru-upay pa an paghatag hin serbisyo ha ira nasasakupan, lakip na an implementasyon han nabalhin nga mga proyekto ngan programa nga hadto ginkaptan han gobyerno nasyunal . Sumala kan DILG Secretary Eduardo Ano, tungod han hul-os nga devolution, magtitikabaskog an kusog han lokal nga pamunuan, ngan pinaagi han kadugangan nga pondo, magtitika-upay an serbisyo.
Upod han nagdudumara han “Angat Lokal PH” Facebook page an mga miembro han Devolution Sub-Committee on Communication Strategy. Para hin kadugangan nga kinaadman kasumpay han devolution, bisitaha an Angat Lokal PH ha https://facebook.com/AngatLokalPH.
