262 nga mga anay miemro ha New Peoples Army (NPA) ngan mga tag suporta hini nga nag surrender ha gobyerno an guin presentar kan President Rodrigo Duterte ha usa nga seremonya ha bungto han San Isidro Leyte han nakalabay nga adlaw. Nag paka sul-ot hin busag nga T-shirt an mga nag surrender han ig presentar hira kan Presidente Duterte.
Duha nga anay NPA an nag hatag hin testimonya nga nag sering nga nalagas nala hira ha pag suporta han kagiosan pero waray natabo nga kaupayan han ira kinabuhi.
Durante han mao nga seremonya nga guin atinderan hin pira nga mga cabinet secretaries ngan mga local officials han Leyte ha pag pangulo ni Leyte Governor Dominic Petilla, guin tagan hin mga livelihood assistance an kada usa han anay mga rebelde nga nag lalakip han 50,000 pesos ngan 15, 000 tikang ha Department of the Interior and Local Government (DILG), 10,000 tikang ha provincial government han Leyte labot la han incentives nga guin hatag han mga armas nga gin surrender ha gobyerno.
Dida han mensahe ni Presidente Duterte hiya in nag saad nga tatagan hin tuna an mga anay rebelde ngan mga tag suporta hini nga ira uumahon kumo suporta han gobyerno para han ira panginabuhi.
Kadam-an han mga nag surrender in mga taga bungto han San Isidro ngan Calubian samtang may tag urosa nga nag surrender tikang ha mga bungto han Burauen, Jaro ngan Mac Arthur.
Ha media interview kan 8th Infantry Division Commanding General Major Gen. Pio Q. Dinoso III hiya in nag sumat nga an damo nga namag surrender in pangilal-an la nga nagtitika menos na an suporta han mga tawo han tererorista nga grupo ha isla han Leyte Leyte nga sumala pa haiya mga lima nala nga armado nga NPA an nakikit-an han militar.
Nag pasalamat hi Gen. Dinoso kan Leyte Governor Dominic Petilla, sugad man kan Southern Leyte Governor Damian Mercado ngan Biliran Governor Rogelio Espina han suporta hini agud ma poypoy an terorista nga grupo han NPA pinaagi han pag patuman han mga programa nga an panuyo mapa upay an panginabuhi han mga tawo haira tagsa tagsa nga probinsiya.
Nag totoo hi Dinoso nga an ka pobrehan pa gihapon an pinaka dako nga rason kon kay ano nga mayda pa na kukumbinsir nga mga tawo nga sumuporta o kon bumulig han mga terorista.
