Isumat.com/12:55PM, Pebrero 19, 2021
Naghahangyo hin pag-ampo an Archdiocese of Cebu para han katalwasan ngan pakabalik ha normal nga panlawas ni Bishop Jose Palma, nga amo yana an nangungulo han Archdiocese.
Iginpasamwak han Cebu Archdiocese yana nga adlaw nga nagpositibo ha Covid-19 an Arsobispo. Hi Palma in nagpa-swab test hadton Mierkules ngan kagab-i gumawas an positibo nga resulta.
Sumala han impormasyon, hi Palma in naka-confine yana ha Perpetual Succor Hospital ha Cebu ngan aada ha “stable condition.” Kasumpay hini, ginkontak na gihapon han mga otoridad ha panlawas an mga iginka-urusa han Arsobispo basi mag-kwarentina.
Hi Palma in nagin Arsobispo han Archdiocese of Palo tikang han 2006 tobtob 2010. Antis hini, nagin obispo gihapon hiya ha Diocese of Calbayog. Nagin pangulo gihapon hiya han Catholic Bishops Conference of the Philippines.
Hi Archbishop Palma in magtitigaman han iya ika-71 nga kaadlawan ha bulan hiton Marso. Nagdumara pa hiya hin Santos nga Misa durante han Ash Wednesday kun diin gintambungan ini han iya mga ka-urusa ha opisina han Archdiocese. #
