Gin-iimbestigar yana han mga otoridad an mga posible nga rason han nahireport nga duha nga kaso hin pagpakamatay kun diin an mga biktima in usa nga Amerikano ngan senior high school student hadin nakalabay nga adlaw.
Hi Ronald Hayward, 54 anyos nga American citizen, in natad-an nga waray na kinabuhi didto han iya balay ha Brgy Makiwalo, Mondragon, Northern Samar. Subay han pag-asoy han iya live-in partner nga hi Rosalyn Mastilero, nagkabalingkutay hira ni Hayward hadto nga adlaw, ngan katapos han ira away, sinmulod ha iya kwarto an biktima nga retirado nga US Army.
Nagsering pa hi Mastilero nga mayda gintumar nga medisina hi Hayward nga posible amo an hinungdan han iya kamatayon. Nagbubuhat pa hin pagsusi an mga otoridad kun naglugaring gud man ini nga Amerikano pagkuha han iya kinabuhi.
Samtang, didto naman ha Santa Fe, Leyte, usa nga senior high school student an gintutuohan nga naagpakamatay pinaagi hin paghikog. An kapulisan in waray la anay ighatag an ngaran han biktima komo respeto ha iya pamilya.
An 19 anyos nga estudyante in nag gamit hin pisi dida han iya pagpakamatay. Hinsabutan nga antis ini nga panhitabo, umapi pa hiya hin group pictorial upod an iya mga kaklase para han ira ti-arabot nga graduation ceremonies. Mayda liwat mga impormasyon nga problema financial an posible nga rason han iya pag suicide kay amo daw ini an iya nasusumat ha iya kasangkayan. Hinsabutan nga an nanay han biktima in adto ha Manila nagpapakabuhi samtang an iya tatay in waray permanente nga trabaho.
Pira liwat han nakilala ha iya in nagbuyagyag nga may mga takna nga ginsisinamad hini nga estudyante an iya kalugaringon.
