Kon may 15 Million nga muroso an Oriental Hotel ha provincia han leyte mas dako iton utang han AMA Computer College nga umabot na hin 50 Million kumo plite han pwesto han Leyte Academic Center nga guin tatag-iyahan han probinsiya.
Ini in sumala han impormasyon nga guin hatag han opisina han provincial Treasurers Office ha Commission on Audit (COA) nga naguin ka parte han audit report han mga transaction han kapitolyo han tuig 2018.
Sumala han COA report nga an mao nga kabaraydan in nag sasakop tikang January 2011 to June 2018.
Na hibaruan han isumat.com nga an kontrata ha butnga han AMA Computer College ngan han probinsiya in 10 years nga nagtikang hadton December 2004 ngan nag tapos hadton December 2014.
Waray na maka bayad an mao nga eskwelahan tikang han January 15, 2011 tubtub han June 2018 han hira in umiwas na ha Leyte Academic Center hinungdan han pag dako han ira muroso.
Sumala ha School Director ha surat hini kan Governor Dominic Petilla nga naka ekspeyensiya hin kakurian hin panalapi an eskwelahan tikang han 2011 tubtub han 2018 hinungdan nga warayna hira makaka bayad han plite.
Subay pa gihapon han audit report nga nag hangyo an AMA nga 10 million nala unta an ira babayaran pero waray sumugot an probinsiya.
Ha parte naman han probinsiya, damo na nga mga demand letters an ira guin padara ha AMA pero waray la gihapon ini mag babayad.
Nahisabutan nga waray pa kaso nga guin salawad kontra han eskwelahan mahitungod han ira obligasyon.
Nag pahayag an pamunuan han Leyte nga pabor hira nga pag irostoryahan nala ini nga ikabaraydan han AMA kontra hiton makadto pa ha korte.
Labot la han AAM mayda pa liwat iba nga mga tenants nga may mga utang ha probinsiya nga amo an masunod: English Language Academy 37 Thousand, St. Agustine School of Nursing 8.3 Million ngan Surcsoft Inc. 20 thousand pesos.
