Nagpahimatngon an Philippine Institute of Volcanology and Seismology (PHIVOLCS) nga posible magkaada pa hin mga aftershock katapos han natabo nga 5.0 magnitude earthquake kanina han alas 9:07 han aga ha parte han Basey, Samar.
Dida han gibabag-uhi nga bulletin nga iginpagawas han PHIVOLCS, nagsering ini nga magin ikmat an mga residente harani han epicenter han linog kay ginbabanabana nga may mga aftershocks.
Nahipatik an sentro han pagbay-og ha 13 kilometros norte katungdan han Basey, ngan may kahiladmon ini nga 94 kilometros. Dara kay hilarum hin duro an sentro hini, deri gud sugad kakusog an Intensity nga inabat han mga tawo ha paghagrani nga mga lugar. An kawsa han linog amo an tinatawag nga tectonic in origin.
An Instrumental Intensity in nagpapakita han Intensity IV ha Palo, Leyte ngan Intensity III ha Borongan, Eastern Samar. Sumala pa han PHIVOLCS, waray nira ginbabanabana nga distroso han mao nga linog.#
(Posted 10:02 AM, April 15, 2020)
