Isumat.com/7:36AM, October 13, 2020
Tinikangan yana nga adlaw, Oktubre 13, igin-implementar an pagpasara han serbisyo han mga opisina ngan korte ha Justice Hall Building ha Laoang, Northern Samar.
An LGU-Laoang in nagpalusad hini nga kamanduan han magpositibo han Covid-19 in usa nga abogado nga pumakadto han Bulwagan ng katarungan hadton Oktubre 5. Hinsabutan nga duha ka semana an lockdown han nasabi nga building upod na gihapon an Municipal Trial Court.
An mga otoridad hin panlawas in naghihimo na yana hin contact tracing katapos la matapnan han virus an pito nga preso ha Laoang Sub-Provincial Jail ug ini nga abogado. Tobtob yana, deri pa nasasabtan kun hin-o an nagpakatapon ha ira. Naha-una na nga igin-lockdown an nasabi nga karsel.
Ha panig naman han LGU, magpapatuman hira hin upat ka adlaw nga skeletal force nga magtatrabaho ha munsipyo para han disinfection.
Samtang, nagpapadayon naman an paglarab han Covid ha Calbayog City. Kakulop, nadugangan hin 21 an mga nadarahigan han kagaw didto han mao nga syudad. Hinungdan hini, umabot na 380 an nagkatatapnan ngan mayda pa porlomenos 250 nga Active Cases hapagkayana.
16 nga mga barangay didto han syudad an ginpa-ilarum ha lockdown ngan sagipo yana an LGU ha pagtimangno ngan panhatag hin relief goods ha apektado nga mga residente.
Ha bug-os nga Eastern Visayas, 5,321 na an na-alakbatan han kagaw ngan 4,665 an naka-recover. An Active Cases yana in 605 ngan nagpapabilin ha 51 an mga pasyente han Covid nga naawat an kinabuhi. #
