Waray na gigios an mga ahensiya han gobyerno nga unta ma nginginano hiton presyo han bugas kahuman nga maipatuman an “rice liberalization Law”
Sumala kan Francis Rosaroso an tagyakan han Department of Agriculture han rehiyon otso nga apinas na mag meeting an inter-agency task force nga amo unta an mag babantay hiton posible nga pag patakas nala hiton mga negosyante han pag presyo han ira baligya nga bugas.
Miemro han mao nga task force an Department of Trade and Industry (DTI), Department of Agriculture ngan sugad man an mga local government units sumala pa kan Rosaroso.
Kon ha parti naman han Department of Agriculture hiya nag sumat nga, mayda nira guin bubuhat nga monitoring hiton presyo han bugas duha ka beses kada semana ngan ira na hibaruan nga aada pa ha normal nga sitwasyon iton presyo hini.
Han naglabay nga mga adlaw hi Department of Agriculture Secretary Manny Pinol in nag sumat han iya obserbasyon nga bisan ha luyo han kadamo na han supply han bugas ha mga merkado, mahal la gihapon an presyo hini.
sumala kan pinol nga napapalit la hin tag 18 pesos kada kilo han bugas nga tikang ha myanmar ngan 23 ngadto ha 25 pesos an kada kilo han bugas nga tikang ha Vietnam ngan Thailand. Mahitungod hini ma barato na unta an pag baligya han bugas han mga negosyante dugang pa ni Pinol.
An pinaka barato nga presyo han kada kilo han bugas in tag 35 pesos kada kilo.
Ha ilarom han Rice Liberalization Law guin tutugotan na an mga pribado nga mga negosyante nga mag import hin bugas basta la hira in mag babayad han kaangayan nga buhis. Ha ilarom han mao nga balaud an National Food Auhority (NFA) in waray na gahum pag control han rice importation kundi an pamalit nala hin humay ha mga parag uma ngan agud ma siguro nga may igo nga supply hin bugas an gobyerno labi na ha panahon hin mga kalamidad.
