TACLOBAN CITY – Padayun nga gintatambal yana an duha nga menor de edad mahuman nga pag tigbason ha Purok 2, Baranggay Cagbayang, Calbayog City.
Subay ha imbestigador han Calbayog PNP nga hi PO2 Eduardo Canaga, an mga biktima in ada ha edad 13 ngan 17 anyos.
Sumala pa kan Canaga nga aga pala han mag-amok ngan mag-alburuto an suspek nga may problema ha panhuna-huna nga ginkilala nga hi Joel Jumangoy, 36 anyos, residente han mao nga lugar.
Dayun nga napugngan han iya amay an mao nga komosyon pero mahuman an pira ka oras han mabayaan ini, in utro naliwat ini nga sumupak ngan nag-amok
Durante han iya pag-amok in tigda niya nga ginsulod an panimalay han mga menor de edad nga nabayaan liwat han ira mga kag-anak nga kumadto ha uma.
Dara han pisaw in pwersahay nga ginsulod han suspek an panimalay han mga biktima.
Han masulod hini an panimalay in tigda hini nga ginpaninigbas an mga biktima.
Maswerte naman nga nakatalwas an mga ini mahuman nga magresponde an mga tanod pero nakag-angkun an mga ini hin grabe nga samad ha lawas.
Padayun naman ini nga gintatambal ha Hospital.
Samtang, maswerte naman nga nakatalwas an 5 anyos nga bata pero yana in nagpapailarum ha psychosocial intervention tungod han naangkon hini nga pagka-trauma.
Nabaruan pa han isumat.com, nga nakaabat hin depresyon an suspek mahuman daw nga mamatay an Tiyo hini.
Samtang kapot naman han Calbayog PNP an suspek ngan naatubang ha kaso nga Attempted Murder.
