TACLOBAN CITY – Nagpasa hin resolusyon an usa nga Kongresista ha Probinsya han Eastern Samar kasumpay ha pagpapabalik han Balangiga Church Bells tikang ha Estados Unidos.
Subay ha House Resolution 1142, ginmanduhan ni Eastern Samar Representative Ben Evardone an Department of Foreign Affairs nga magdumara hin mahugot ngan Diplomatiko nga aksyon agud nga mabawi an mao nga mga Kampana.
Komo tinaglawas han Eastern Samar, nagtutuo ini nga an pagkakabawi han Balangiga Church Bells in Simbolo han Kabayanihan ngan Kamaisog han mga Ninuno nga nakigbisog ha mga Amerikano.
Panahon na gihapon daw nga maibalik na ha pagkayana ini agud nga mawara na an naging lamat ha natabo nga
Philippine- American War dida han 1901 ngan mapadig-on an relasyon han Pilipinas ngan Estados Unidos.
Ha ikaduha nga State of the Nation Address (SONA) ni Pangulong Rodrigo Duterte malapirit hini nga gin-kaykay an ginbuhat nga pagkuha han mga sundalo nga Amerikano ha Balangiga Bells mahuman an pagmasaker ha mga
Kalalakihan ha Samar Province.
Ginpahayag han Presidente nga dapat nga igbalik ini han Amerika mahitungod nga gintatag-iyahan ini han Pilipinas ngan parte han aton national heritage.
“Give us back those Balangiga bells. They are ours. They belong to the Philippines. They are part of our national heritage. Isauli naman ninyo. Masakit ‘yun sa amin,” sumala han pangulo
