Isumat.com/Setyembre 28, 2023
Mga panhulga ha kinabuhi an nakakarawat hin pira nga mga opisyales hin mga barangay ha bungto han Leyte, Leyte sumala han hepe han kapulisan han nasabi nga lugar.
Ha pakighimangraw han iFM-RMN Radio kakulop nga adlaw, Setyembre 27, 2023 kan Chief of Police Capt Rusty Alvarado, iginsumat niya nga mayda pira nga mga barangay officials han bungto an nakakakarawat hin death threat.
Sumala kan Alvarado, ini nga mga impormasyon an gin-validate han ira estasyon ngan nakumpirmar han kapulisan nga mayda man gud panhulga ha kinabuhi kontra hini nga mga opisyales.
Kun manunumduman, duha nga kandidato ka kapitan del barangay han mao nga munsipalidad an gingamaan yana nga bulan han Setyembre kun diin an mga biktima in nagpakatalwas han mao nga mga insidente.
Hadton Setyembre 7, hi Kagawad Jenny dela Pena nga kandidato ka kapitan han Brgy Tag-abaca in gin-ambush. Hiya in naigo hin mga bala ngan nadara ha hospital.
Sumala kan Alvarado, nakatalwas an biktima ngan nakagawas na ha hospital. Gin-aandam na gihapon han kapulisan an pagsampa han kaangayan nga mga kaso kontra han mga suspetsado nga naka-eskapo katapos han krimen.
Hadton Setyembre 27, hi Brgy Bacu Chairman Edgar dela Rosa in gin-ambush hin riding-in-tandem nga mga suspek samtang nagmamaneho han iya pick-up an biktima ha town proper.
Waray maigo hi Dela Rosa kay nakaduko hiya han pagpaarakan hiya hin bala. An mga suspek in nakakalagiw ngan ginhahalpat yana han mga otoridad.
Hi Dela Rosa in nagtotoo nga an pag-iparatay ha iya in may kalabutan han iya pagtestigo hin usa nga kaso ha San Isidro, Leyte, sumala kan Alvarado.
Hinsabutan nga ini nga gingamaan nga mga barangay officials in ka-alyado han alkalde han bungto, Mayor Arnold James Isidoro.
Kasumpay hini, hi Alvarado in nagpatapod nga mahimyang an bungto han Leyte, Leyte ngan ginhihimo han kapulisan an ngatanan nga paningkamot basi deri na mautro an sugad hini nga mga panhitabo. #
