Isumat.com/Setyembre 19, 2023
Ginkakabarak-an nga waray na magbabaligya han tag 41 ngan tag 45 pesos kada kilo nga bugas ha merkado publiko han Tacloban City.
Nagpahayag hi Frederick Dy, Presidente han Grains Retailer Confederation of the Philippines Tacloban Chapter, nga gulpi na iton kalugi-an nga gin-aantos han mga rice retailers ha merkado tikang ig-implementar an kamanduan han Malakanyang nga price cap ha regular ngan well-millded nga bugas nga deri malapos hin 45/kilo.
Nagsumat hi Dy nga dida ha Tacloban Public Market, bangin hiya nala an nagbabaligya han tag 41 an kilo, pero kun ma-imod na an suplay, deri na hiya magbabaligya pa.
Amo gihapon ini an matatabo han tag 45/kilo nga well milled rice, sumala kan Dy. Ha masunod nga pira ka adlaw, posible nga waray na tag-45 nga bugas ug an makikit-an ha merkado amo nala an mga premium ngan imported rice nga sobra 50 pesos an presyo.
Sering pa niya, waray na magagad nga rice retailer pagbaligya hin 45 pesos kay an ira pagpalit ha mga rice millers ha Abuyog ngan MacArthur, Leyte in tag 45 an kilo, sanglit waray na ganansya ngan lugi pa an rice retailers.
Iginbuyagyag pa ni Dy nga tobtob yana, waray pa bisan usa nga rice retailer ha Tacloban Public Market an nakakarawat han ayuda pinansyal han gobyerno ngadto han mga nagbabaligya hin bugas nga apektado han kasugu-anan han Presidente.
Hadton Setyembre 13, an DSWD in nagtikang na panhatag hin tag 15 Mil pesos nga ayuda ha mga rice retailers ha magkalainlain nga parte han rehiyon.
Pero sumala kan Dy, tobtob han Setyembre 18, waray pa nakaka-agom hini nga hinabang dida han mga parabaligya hin bugas ha Tacloban Public Market. #
