Isumat.com/Hunyo 20, 2023
Tungod han gin-aalegar nga pakasupak han mga balaud ha pagproteher han kalibungan, karuyag ni Leyte 4th District Rep. Richard Gomez nga sampaan hin mga kaso kriminal ngan administratibo an mga opisyales han Palompon, Leyte ngan DENR-Region 8.
Hi Gomez in nanawagan ha House Committee on Natural Resources nga maghimo hin komprehensibo nga report nga magrerekomendar pagsalawad hin kaso kontra han nasabi nga mga indibiduwal tungod han pakatalapas han Land and Environmental Laws.
Kinahanglan mahisampa ha buhatan han Ombudsman ini nga mga reklamo tungod han bayolasyon han Forestry Act labi na an grabe nga polusyon han katubigan, tuna ngan hangin ha Palompon ngan Albuera. An nasabi nga mga munisipalidad in sakop han 4th District han Leyte.
Igindidig-on han kongresista nga an operasyon DBSN Farms Agriventure Corporation an rason han nasabi nga polusyon ha kalibungan didto han nasabi nga mga munisipalidad. Ini nga kompaniya in usa nga chicken dressing plant kun diin ginpoproseso an yinukotyukot nga kamanukan para han distribusyon han magkalainlain nga negosyo hin pagkaon ha Sinirangan Bisayas.
Ha report han Inquirer.net, nagpapakita an pag-istudyo han University of Sto Tomas Department of Biological Sciences nga an solid waste tikang han planta an hinungdan han polusyon ha Ormoc Bay. Ini nga mga hugaw in naglalakip han ulo ngan tina-e han kamanukan, sering pa han report.
Kun manunumduman, hi Gomez in nagsalawad hin resolusyon ha kongreso nga imbestigaron an operasyon han nasabi nga planta. Nagkamay-ada hin pira ka beses nga hearing an komitiba ha kongreso kun diin iginsaysay han magbabalaud an iya alegasyon kontra han kompaniya. #
