Isumat.com/Enero 10, 2026
Hi anay Leyte 3rd District Congressman Eduardo K. Veloso ngan Technology Resource Center legislative officer Rosalinda Lacsamana in ginsentensyahan han Sandiganbayan hin kapresuhan nga maabot hin 56-anyos tungod hin 2 ka ihap nga graft ngan 2 ka ihap hin malversation nga mga kaso.
Ini nga mga kaso in nag-ugat han deri insakto nga paggamit han kan Veloso Priority Assistance Fund (PDAF) kantidad hin 24.2 Milyones pesos hadton 2007.
Hira Veloso ngan Lacsamana in mapepreso hin 6 tobtob 10 anyos ha kada ihap han duha nga graft cases, ngan 12 tobtob 18 anyos ha kada ihap han duha nga malversation cases.
Labot la han kapresuhan, iginmando gihapon han Sandiganbayan nga magbayad hira Veloso ngan Lacsamana hin 24.2 Milyones pesos.
Napamatud-an han prosekusyon nga waray mga testimonya ngan waray liwat mga dokumento nga iginpresentar an mga akusado nga magpapakita nga gin-liquidate ngan gingamit ha mga livelihood projects didto han distrito an mao nga pondo, subay han desisyon han hukmanan.
Ha 52 ka pahina nga desisyon han 1st Division han Sandiganbayan, an pondo han kongresista in iginbalhin ha TRC nga amo unta an implementing agency ngan Aaron Foundation Philippines komo partner NGO ha pagpatuman han livelihood ngan development projects ha ikatulo nga distrito han Leyte.
Dida han pagbista han kaso, igindig-on han Ombudsman nga an Aaron Foundation in waray kapas pagdumara han nasabi nga mga proyekto kay mayda la ini 68,000 pesos nga capital stock.
Kasumpay hini, iginmando gihapon han Sandiganbayan nga doblehon an kantidad han piyansa han duha nga anay opisyal para han ira temporaryo nga pakagawas ha karsel samtang waray pa finality an desisyon.
Tobtob han ginsusurat ini nga balita, waray pa iginpagawas nga pahayag an kampo nira Veloso ngan Lacsamana.
Hi Veloso in nagin tinaglawas ha kongreso han 3rd District of Leyte tikang 1998 tobtob 2007. An mao nga distrito in nakakasakop han mga bungto han Leyte, Calubian, San Isidro, Tabango ngan Villaba.# (with reports from abs-cbn and GMA News)
