Isumat.com/ Nobyembre 23, 2022
Tikang han Enero tobtob Nobyembre 12, 2022, 15 nga indibiduwal ha Eastern Visayas an naanaw an kinabuhi tungod han dengue, an makamaratay nga sakit nga gindadara han lamok.
Ha interview han iFM-Tacloban, iginbuyagyag ni DOH Regional Information Officer Jelyn Malibago nga 15 katawo an namatay ha rehiyon dara han dengue kun diin siyam in tikang ha Southern Leyte, ngan tagduruha tikang ha Leyte, Eastern Samar ngan Samar.
Ini in hitaas hin duro nga ihap han namatay para han yana nga tuig, kay hadton 2021 waray nahilista an Regional Epidemiology Center han DOH nga naawat an kinabuhi tungod han dengue.
Sering pa ni Malibago, duro hin kahitaas an pagsaka han nadarahigan hini nga sakit yana nga 2022 kay umabot na ini hin 5,615 nga kaso, kun igtatanding han una nga tuig nga 718 la. Ini in nagpapakita hin paghitaas nga 650 porsyento han mga kaso hin dengue.
Mayda gihapon natudlok an DOH nga clustering of cases hin pira nga barangay ha bug-os nga rehiyon. Bootsidngon hini, mayda tulo o sobra pa nga kaso hin dengue an nahitabo ha usa nga barangay. Ini in nahipatik ha Brgy 109, Tacloban; San Isidro, Ormoc City; Brgy Poblacion, Baybay City; Brgy Sacme, Tanauan, Leyte; Brgy Ychon, Macrohon, Southern Leyte; Brgy Buenavista, Eastern Samar; ngan usa nga barangay ha Laoang, Northern Samar.
Kasumpay hini, mahugot an panawagan han DOH ha publiko nga magin alerto kontra han dengue ngan pirmi maglimpyo ha ira mga panimalay ngan kalibungan labi na gud an paglikay hin pagbi-aw hin tubig labi na nga panahon yana han uuran.
Kinahanglan gihapon magpakunsulta dayon an mga mulopyo ha health centers kun may gin-aabat nga sintomas han dengue ngan deri na maghulat nga magin grabe an sitwasyon han panlawas. #
