Isumat.com/Agosto 12, 2022
Ginhihingita ni An Waray Partylist Representative Bem Noel nga mas magin matarom pa an ngipon han balaud kontra han peke nga mga balita.
Hi Noel in nagsalawad ha kongreso han House Bill 2971 kun diin may panuyo hini nga magin kriminal nga binuhatan an pagpasarang hin deri tinood nga mga impormasyon.
Pinaagi hini nga balaudnon, karuyag han kongresista nga magkaada hin pag-amiendar an Cybercrime Prevention Act of 2012 basi deri na makalusot an mga grupo o indibiduwal nga nagpapasarang han peke nga notisya.
An balaudnon nga iginsampa in tinatawag nga “Act of Criminalizing the Creation and Dissemination of Fake News.”
Ha ilarum han nasabi nga balaudnon, papahalu-agon an masasakop hini kun magin balaud na kay iglalakip na denhi an mga media outlets, teleibisyon, radyo, peryodiko ngan ordinaryo nga mulopyo.
Ini nga balaudnon in maagi pa han hingpit nga pag-utingkay ngan diskusyon han mga magbabalaud labi na nga waray wantas an peke nga mga balita denhi ha Pilipinas labi na ha social media. #
