Isumat.com/Hulyo 15, 2022
Nasalbar han mga otoridad in tulo nga menor-de-edad nga kababayen-an tikang ha prostitusyon han ma-aresto an nagbubugaw ha ira hadton maagahon han Hulyo 14, 2022 ha Tacloban City.
Ha report han NBI-Regional Office 8, ginkilala an suspetsado nga hi alyas Jolina, 21 anyos ngan residente han Brgy 66.
Nagdumara hin operasyon an mga NBI Agents ngan ira na-aktuhan hi Jolina nga iginbubugaw in tulo nga mga teen agers ha eskina han Avenida Veteranos ngan Sto Nino nga mga kalsada hadto nga mga takna.
Duha han mga na-rescue in nag-eedad hin 14 anyos, samtang an usa in 16 anyos. Hira in iginbubugaw ha mga kalalakin-an kabalyo hin 3500 pesos basi makighilawas.
An suspetsado in nakatalaan sampaan hin kaso kasumpay han iya pakasupak han balaud han Anti Human Trafficking, samtang an mga menor-de-edad nga na-rescue in igtutubyan ha kaangayan nga ahensya han gobyerno basi timangnoon. #
