Isumat.com/Hunyo 6, 2022
Tulo nga suspetsado an nagkadadakop ngan dako nga kantidad hin iligal nga droga an narekupo han magdumara hin operasyon an mga tinubyanan han balaud ha Brgy Zaragosa, Matalom, Leyte hadton Hunyo 4, 2022.
An mga operatiba han PDEA-Region 8 upod an mga kapulisan han Leyte Provincial Office ngan Matalom PNP an naghimo han buy-bust operation pasado alas 7 han gab-i didto han mao nga lugar nga nagresulta han kapukan han drug den.
Nadakop dida han operasyon an mga gin-aalegar nga nagmimintenar han drug den nga hira Arvie Miras ngan Joy Lastra, ug an ira bisita hadto nga takna nga hi Rogelio Miras.
Dida han chemistry report han PDEA, an droga in may timbang nga 17.03 gramos ngan balor ini hin 115, 806 pesos.
An mga suspetsado in temporaryo iginpaslak ha Matalom PNP Lock-up Facility ngan maatubang han kaso kasumpay han pakatalapas han Comprehensive Dangerous Drugs Act of 2002.
Samtang, didto naman ha Calbayog City…patay an usa nga lalaki han pagpusilon hiya kagab-i (Hunyo 5, 2022) ha Brgy Hamorawon han nasabi nga syudad.
Ha inisyal nga imbestigasyon, an biktima in pinusil hin waray pa hikilal-i nga suspetsado samtang hiya in natukdaw ha atubangan hin usa nga bakeshop han nasabi nga lugar.
An mga imbestigador in waray pa maghatag han pangilal-an han biktima ngan nagpapadayon pa an imbestigasyon.
Waray pa gihapon madakop an suspetsado nga kadagmitan kumalagiw katapos han krimen. #
