Mayda na liwat igkakaparayaw an mga Leyteno ug an bug-os nga Eastern Visayas kay an nanguna ug naka-angkon han ika-napulo nga pwesto han katatapos pala nga Licensure Examinations for Mechanical Engineers amo in taga Merida, Leyte ngan Ormoc City.
Dida han impormasyon nga iginpagawas han Professional Regulations Commission (PRC) hi Mark Anthony Salazar Arcayan nga nag-eskwela han iya kolehiyo ha Visayas State University (VSU) ha Baybay City, Leyte amo an numero 1 dida han mao nga eksaminasyon.
Hi Arcayan nga taga Brgy Can-unzo, Merida, Leyte in nakakuha hin 96.60 % nga grado dida han eksaminasyon. Hinsabutan pa nga ha Merida Vocational School nakagtapos han iya sekondarya hi Salazar kun diin hiya an valedictorian han iya batch.
Ini in nagdurot hin tim-os nga kalipay para han iya pamilya, maga taga Merida sugad man han unibersidad ha VSU.
Ha luyo nga bahin, an taga Ormoc City nga hi Loiue Genobiagon Delos Santos in may rating nga 93.80 % nga nagdara ha iya ha numero 10 nga pwesto han Licensure Exams. Hiya in nagtapos han iya kurso ha Unversity of Cebu.
An nasabi nga eksaminasyon in gindumara hadin Pebrero ha magkalainlain nga lugar ha Pilipinas kun diin dida han 3,780 nga nagkuha han eksaminasyon, 2,121 an nakapasar. #
