Isumat.com/Pebrero 26, 2022
Hi WBO Bantamweight champion John Riel Casimero in magdedepensa han iya korona ha boksing ngan magdedepnsa gihapon hiya han iya kalugaringon tungod hin reklamo nga “act of lasciviouness” nga iginsampa hin menor de edad nga babaye kontra ha iya.
An taga Merida, Leyte nga kampeon in aadto yana ha Estados Unidos para mag-ensayo han tiarabot nga title defense kontra kan challenger Paul Butler ug an ira asdangay in bubuhaton hiton Abril.
Pero sugadsugad nga namimintana nga madiskarel an iya ensayo kay ginsampaan hiya hin reklamo hin usa nga daragita nga nag-alegar nagbuhat hin malaw-ay nga ginawi-an an boksingero ngadto han tagreklamo hadton Hunyo 2021 ha Taguig City.
An daragita in nagsering ha kapulisan nga hadto nga adlaw, iya nakit-an hi Casimero nga nag jogging didto ha Taguig ngan nagpa-litrato hiya upod han boxer. Iginhatag ni Casimero an iya account ha facebook ngan pagkakulop nagka-chat na hira ha social media.
Ginkumbida hiya han boxer ngadto han hotel room kun diin naka-check-in hi Casimero ngan ginpadad-an pa daw hiya hin pamasahe ha taxi.
Nagkita hira didto han kwarto ngan nag-istorya ngan tungod nga makusog hadto an uran, nagsering hi Casimero ha iya nga didto nala kumaturog. Sumugot hiya han karuyag han boksidor, pero an nahitabo ginkahaman hiya ha pribado nga mga parte han iya lawas, pahayag han tagreklamo.
An reklamo an iginsalawad han kapulisan ha Taguig City Prosecutors Office nga amo an magtitirutimbang kun ini in angay ba igsampa ha korte. Ginhuhulat pa yana han Prosecutor an magigin kabatunan han kampo ni Casimero.
Nagsering an bugto ni Casimero nga himo-himo la ini nga akusasyon ngan andam hira pagbaton han nasabi nga reklamo.
Kun magdesisyon an prosekusyon nga igsampa an reklamo ha husgado, dako an posibilidad nga deri mapapadayon ni Casimero an iya pag-ensayo kay mamanduan man hiya nga umatubang ha korte.
Namemeligro an korona ni Casimero kay kun manunumduman, an WBO in igbusay na nga bawi-on an titulo ha iya hadin Uktubre 2021 kay waray hiya makig=engkwentro kan Butler kay nagkaada hiya hin sakit antis an away.
Hinungdan hini, an WBO in naghatag ha iya hin tsansa nga panalipdan an iya korona hiton Abril, pero mayda na liwat bag-o nga isyu kan Casimero.
An kampo ni Casimero in nagpapaki-ana ngadto han tagreklamo kun kay-ano nga yana manla hiya nagsalawad han complaint. Sumala han daragita, nahahadlok hiya hadto kay bantuganan nga tawo hi Casimero ngan hiya in ordinaryo la nga indibiduwal ngan waray niya mga paryente nga maugop ngan masuporta ha iya. #
