Isumat.com/Pebrero 23, 2022
Patay in usa nga rebelde nga NPA dida hin asdangay kontra han mga tropa han Philippine Army ha Brgy Deit de Turag, Silvino Lubos, Northern Samar alas 2 han kulop, Pebrero 21, 2022.
Ha report han 8th Infantry Division, an mga kasundaluhan han 803rd Infantry Brigade an iginkasurapo han terorista nga grupo nga gintotoohan mga miembro han Front Committee I, Sub Regional Committee Emporium ha ilarum han panguna ni Acer Torcido alyas RR.
Naawat an kinabuhi han waray pa hikilal-i nga rebelde dida han engkwentro ug an iya patay nga lawas in ginbayaan han iya mga kaupdanan nga kumalagiw tikadto ha Pambujan-Las Navas nga dereksyon.
Narekupo gihapon han militar in usa nga M-16 rifle, usa nga magazine nga puno hin bala ngan iba pa nga mga higamit han mga rebelde katapos han 20 minutos nga pinusilay.
An namatay nga rebelde in tatagan hin desente nga paglubong ipinaagi han Municipal Task Force-ELCAC han nasabi nga bungto.
Kasumpay hini, an militar in nanawagan ha mga rebelde nga igsurender an ira mga kaupdanan nga nasamad dida han aragway basi pagtambalon ha hospital. Nagpasalamat gihapon an militar ha mga sibilyan han ira kooperasyon ha mga pitad basi mapoypoy na an problema han insureksyon ha Northern Samar.
Samtang, usa naman nga rebelde an nagsurender ha mga otoridad ha Gandara, Samar kakulop, Pebrero 22, 2022.
Ginkilala an nagsurender nga hi Alyas Yamog, 24 anyos ngan residente han Brgy San Antonio han mao nga bungto. Hiya an Team Leader han Squad 1 Platoon Zandrew, Sub Regional Committee Emporium.
Hi Alyas Yamog in nagtubyan gihapon hin usa nga 9mm Smith and Wesson Revolver, lima nga bala ngan usa nga granada.
An PNP Samar in mag-eendorsar han rebelde basi makatagamtam hiya han mga beneipisyo tikang ha gobyerno. #
