Isumat.com/Pebrero 15, 2022
Waray kalabutan ha ti-arabot nga eleksyon an natabo nga sunod-sunod nga panmatay ha Samar, labi na ha syahan nga distrito han probinsya, sumala kan PNP Regional Director BGen Bernard Banac.
Ha report han Philippine News Agency (PNA), nagsering hi Banac nga subay han inisyal nga imbestigasyon han mga otoridad, deri nahikakanit ha eleksyon an nasabi nga madugo nga mga panhitabo ha Calbayog ngan Sta Margarita hadin nag-agi nga pira ka adlaw.
Igindig-on han heneral nga an nasabi nga panmatay in matutudlok nga aada ha “Criminal and Security operations.” Ha kamatuoran, tobtob yana, waray pa igindeklarar nga election hotspots ha Samar, sering pa ni Banac.
Kun manunumduman, tulo ka tawo an nagkamamatay ngan usa an nasamad han gamaan hira hin pira nga suspetsado ha Brgy Roxas, Sta Margarita hadton Pebrero 6.
Ginsundan ini han pagpataya kan Brgy Migara, Calbayog SK kagawad Gerald Casaljay hadton Pebrero 8.
Dida han panhitabo ha Sta Margarita, duha na nga suspetsado an nagkadadakop ngan nasampaan na hin kaso nga murder, frustrated murder ngan attempted murder. Iginlakip gihapon dida han kaso an mga kaupdanan han mga gintatahapan nga nagpaka-eskapo.
Ginbabanabana nga 20 ka tawo an nagbuhat han pag-ambush ha Sta Margarita, sumala han pahayag han kapulisan han bungto. Nagsering pa an Sta Margarita PNP nga an iba nga suspetsado in miembro hin Private Armed Group, pero ini nga grupo in maiha na nga deri aktibo.
Haros ngatanan han mga suspetsado han insidente ha Sta Margarita in mayda mga warrant of arrest durot hin naha-una nga mga kaso kun diin nahidadabi hira.
Ha luyo nga bahin, waray pa na-aresto nga suspetsado han pagpataya han SK Kagawad.
Gintutudlok nga mga supporters ni Sta Margarita mayoralty bet Emil Zosa an mga biktima dida han Pebrero 6 nga insidente, samtang an SK Kagawad in kaapi hin usa nga grupo hin kabataan nga nasuporta han pamilya Tan. #
