Isumat.com/Pebrero 9, 2022
Usa nga kapitan hin barangay, duha nga barangay kagawad ngan usa nga anay kaapi han CAFGU an nagkasisikmit han mga otoridad tungod han ira pakatalapas han balaud ha magkalainlain nga operasyon kontra kriminalidad nga gindumara han PNP ha Eastern Visayas hadin nag-agi nga pira ka adlaw.
Ha Southern Leyte, na-aresto an 55-anyos nga kapitan han Brgy Banabo, Bontoc, Southern Leyte ngan duha pa nga iba samtang naghihimo hin tupada ha ira lugar. An suspetsado in ginkilala nga hi Gerardo Tibon, chairman han mao nga barangay. Narekupo gihapon tikang ha ira in duha nga igburulang nga manok nga 1,200 nga pusta.
Nadakop naman hi Kagawad Johnrey Belicario tungod han pakatalapas han RA 7610 o Special Protection Against Abuse on Children. An warrant of arrest an iginserbe ha iya han mga otoridad ha iya gin-uukyan ha Brgy Barobo, Llorente, E. Samar.
Ha bungto han Rosario, Northern Samar, hi kagawad Reino Dullesco han Brgy Buenavista upod in duha nga kababayen-an in nagka-aaresto samtang nagto-“tong-its” ha ira lugar. Nakumpiskar gihapon an baraha ug an pusta kantidad hin 2,300 pesos.
Samtang didto naman ha Laoang, Northern Samar, nadakop in usa nga anay kaapi han CAFGU tungod han kadiskubre hin mga armas ngan bala nga iya ginhihipos ha iya panimalay ha Brgy Oleras hadton Pebrero 7, 2022.
An 53-anyos nga suspetsado in nakuhaan hin usa nga kalibre 38 nga pistola, usa nga improvised handgun, mga magazines ngan bala. An mga otoridad in may dara nga search warrant ngan gin-updan han mga barangay offcials dida han operasyon. An suspetsado in waray makagpakita han kaangayan nga mga dokumento para han mga armas.
An mga nagkadadakop in preso ha tagsatagsa nga PNP Stations ha ira lugar para han kaangayan nga dokumentasyon ngan disposisyon. #
