Mag titikang na hiton January 9, 2022 an pag patuman han Election Period tubtub ngadto hiton June 8, 2022 ini in may kalabutan hiton pag dudumaraon nga national ngan local elections hiton May 9 yana nga tuig.
Mahitungod hini deri na tutugotan an bisan hin-o nga dinara-dara hin pusil gawas han mga panimalay bisan pa ini lisensiyado kon waray katugutan tikang ha Commission on Elections deri la ha mga sibilyan kundi pati an mga otoridad sugad han mga pulis ngan mga sundalo.
Pwede la mag dara hin pusil adton mayda certificate of authority nga ma tikang ha Committee on the ban of firearms and security concerns han COMELEC lakip hini dinhe adton mga pulis ngan sundalo nga gin tudlok han COMELEC nga mag duty pero kinahanglan nga sul-ot nira an ira uniform.
Deri na gihapon tutugotan adton mga politiko nga magka ada hin mga armado nga mga bodyguards bisan pa ini kon mga pulis o kon sundalo labot la kon may hulga han ira kinabuhi pero ma depende liwat ini hiton pag imbestiga hiton mga otoridad kon kinahanglan ba gudman nga hira in tugutan nga magka ada hin mga bodyguards.
Ha siyudad han Tacloban naman, gin sumat ni Atty Goretti Caña an City Election Officer an mga lugar nga kon diin magkaka-ada hin mga checkpoints nga amo an mga masunod: Ha may marasbaras community precinct ha barangay 82, Diit community precinct ha barangay 99, New kawayan police station 3, ngan imelda village ha barangay 36-A.
Sumala pa kan Atty. Caña nga pinag usa nga pwersa han mga ka pulisan ngan mga kasundalohan an mag dudumara han checkpoint ha pag pangulo han COMELEC. Mas mabug-at nga sirot an ipapataw han hin-o man nga ma talapas han gun.
Ha ilarom han election period dire na gihapon tinutugutan an pag balhhin han mga empleyado ha gobyerno nga sakop han Civil Service Commission lakip an mga kamaestrahan pati an pag suspendi han mga lokal nga opisyal labot la kon ini in subay hin usa nga desisyon han korte may kalabutan han Anti Graft and Practices Act.
