Isumat.com/Disyembre 6, 2021
Deri na miembro han Philippine National Police an pira nga opisyal nga nahidabi han pagpatay kan anay Calbayog City Mayor Ronaldo Aquino ug han iya mga escorts hadton Marso 8, 2020.
Dida han nakuha nga impormasyon han The Calbayog Journal, gin-aprobaran ni anay PNP Chief Guillermo Eleazar an rekomendasyon han PNP-Internal Affairs Service (IAS) nga lakniton ha serbisyo hira LtCol Harry Sucayre, LtCol Shyrille Tan, Sgt Neil Cebu ngan Cpl Edsel Omega.
Subay han report, pinirmahan ni Eleazar an nasabi nga dokumento hadton Nobyembre 8, 2021. Kun manunumduman, hi Eleazar in nagsaad nga tatagan niya hin aksyon an rekomendasyon han IAS antis hiya magretiro ha PNP.
Hadton Agosto 2021, an IAS in nagsubmiter kan Eleazar han resulta han ira imbestigasyon han mga kaso administratibo nga iginsampa ha National Police Commission kasumpay han madugo nga insidente.
An mga kaso amo an lima ka ihap hin Grave Miscounduct, upat ka ihap hin Murder, Frustrated Murder ngan Grave Irregularity in the Performance of Duty. Tungod kay napamatud-an han IAS nga salaan an mga akusado, hira in ginsirutan hin Dismissal from the Service.
Ini nga desisyon han PNP in kanan kaso administratibo la, kay an nasabi nga mga opisyales in naatubang liwat hin kaso kriminal nga iginsalawad han NBI ha Department of Justice.
Hi Aquino ug duha nga iya kaupod in namatay dida han gin-alegar nga engkwentro kontra han kapulisan ha Brgy Lonoy, Calbayog.
Nagsering an grupo nira Sucayre nga deri hira maaram nga sakay hi Aquino han van nga ira ginsusundan. Igindig-on pa nira nga an sakay han van ni Aquino an nag-una hin pagpusil ha ira ngan bumulos la hira.
Ha panig han kapulisan, namatay dida han pupsilay hira Gandara, Samar Chief of Police Joselito Tabada ngan Sgt Romeo Laoyon han Samar PNP Drug Enforcment Unit.
An sibilyan nga hi Clint John Yauder nga naagi la dida han lugar hadto nga panhitabo in binawi-an gihapon hin kinabuhi han ma-igo hin layaw nga bala.
Dida han kaso kriminal ha DOJ, mayda duha nga pulitiko ha Samar nga igindugang dida han mga akusado nga gintutudlok mastermind han pagpataya kan Aquino. #
