Isumat.com/Nobyembre 16, 2021
Klaro nga madig-on la hihapon an kontrol han Pamilya Espina ha probinsya han Biliran bisan kun may nag-withdraw ngan nagpabaru-balyo hin gindadalagan nga posisyon para han eleksyon sunod nga tuig.
Dida han deadline han substitution ngan withdrawal han mga kandidato kakulop, Nobyembre 15, nakalasan an mga Biliranon han umatras hi incumbent Governor Rogelio Espina han iya kandidatura para han nasabi nga posisyon. Iya unta ginhihingita an iya ikaduha nga termino komo amay han lalawigan, pero dida han pasado alas 10 han aga, gin-witdraw han governador an iya Certificate of Candidacy.
Kataliwan hini, ginbakwi liwat ni Mayor Gerard Espina an iya kandidatura komo re-eletionist pagka alkalde han Naval ug hiya an lumiwan han kandidatura han iya amay pagka-gobernador.
An manghod nga bugto ni Mayor Gerard nga hi Gretchen in umatras naman han iya kandidatura pagka konsehal, ngan hiya an lumiwan kan iya kuya para pagka mayor han Naval.
Subay hin katatapuran nga mga surok, usa han mabug-at nga mga rasones han pag-atras ni Gobernador Espina amo an iya tinguha nga personal nga pagtimangno han ira edaran na nga iroy, hi Asuncion Espina. An gobernador nga usa liwat nga doktor in madiskanso la anay ha pulitika tungod hini nga rason.
Tikang pa han 1995, ginkontrol na han pamilya an poder ha Biliran han madag-an ni Gerardo Espina Sr an pagka congresista han lalawigan.
An nalingkod yana nga congresista han lalawigan amo hi Gerardo “GerryBoy” Espina Jr. Ha luyo nga bahin, hi Rodlfo Espina nga karuha han gobernador amo an alkalde han Kawayan. An mga anak ni Rodolfo nga hira Jake ngan Roselyn in mga kandidato liwat. Hi Jake in nadalagan ka Vice-Mayor han Kawayan, samtang hi Roselyn in naghihingita nga magin board member han probinsya.
An pamilya ug an ira mga ka-alyado in nagtindog han lokal nga partido Bando Espina nga amo na an nagin dominante nga grupo-political dida han probinsya hin sobra na duha ka dekada. #
