Isumat.com/Hunyo 17, 2021
Walo katawo an nahulog ha kamot han mga otoridad dida han buy-bust operation nga gindumara han PDEA-Region 8 kun diin nabuksot nga mayda drug den ha Brgy 105, Suhi, Tacloban City hadin nakalabay nga adlaw.
Ha report han PDEA, an operasyon in ginhimo alas 7:45 han gab-i hadton Hunyo 15, 2021 didto han nasabi nga barangay.
Ginkilala an mga suspetsado nga hira Allan Vinas, an gin-aalegar nga nagmimintenar han drug den; ug an masunod nga mga tawo nga naabtan didto han lugar – Romnick Juble, Edwin Ocenar, John Leand Lopido, Bryan Dela Cruz, Eric Yepes, Cris Ian Montejo ngan Raymond Macawile.
Nakumpiskar tikang han mga suspetsado in napulo ka sachet hin gintotoohan nga shabu. Ini in may timbang nga 20.25 ka gramos ngan balor hin 137, 740 pesos.
Hadto gihapon nga adlaw, pasado ala 1 han udto han magkaada hin anti-illegal drugs operation an Tacloban City PNP ha Brgy 96, Lumbang 1, Tacloban City.
Nadakop dida hini nga operasyon an mga gintatahapan nga hira Norman Abiertas alias Ebap, 45 anyos; ug hi Reyanel Borrico, alyas Tata, 21 anyos. Hira ngaduha in residente han mao nga barangay.
Nakuha tikang ha ira in lima ka sachet hin gin-aalegar shabu kantidad hin 2,500 pesos, cellphone ug an 500 pesos nga buy-bust money.
An mga suspetsado ha magkalain nga insidente in ginsampaan han kaangayan nga kaso ngan yana nakadetener ha karsel. #
